Dans is Byron Carelse se hele lewe. Dit is sy energie, sy passie, sy geluk … sy vonk. Wanneer die ritme sy lyf beetkry, vergeet hy van die probleme wat by die huis op hom wag.
Sy beste vriendin, Tasha, sê altyd hy moenie toelaat dat ander mense sy vonk steel nie. Maar sy weet nie van die dinge wat by sy huis gebeur nie. En dalk is dit beter so. Wat sal sy van hom dink?
Op ’n dag sien iemand Byron se talent raak. Hy kry saam met ’n groepie ander township-kinders die kans om deel te wees van ’n glansryke vertoning by die kunstefees. Die kans om groot drome te droom … groter as die township waar hy bly. Maar wat doen jy as die lewe jou drome probeer steel?
Hierdie splinternuwe jeugroman uit die pen van Fanie Viljoen is in eenvoudige, maklik verstaanbare taal geskryf – perfek vir trae lesers of lesers wie se tweede of derde taal Afrikaans is.

Waar kan jy die boek kry?

Dromers is beskikbaar by alle goeie boekwinkels.

Koop die boek aanlyn by Loot.

Koop die boek aanlyn by Takealot.

Koop die e-boek aanlyn by Lapa Uitgewers.

Koop die e-boek by Amazon.

Engels

Dromers (Dreamers) is ook nou in Engels beskibaar.

Kry die boek by alle goeie boekwinkels.

Koop die boek aanlyn by Loot.

Koop die boek aanlyn by Takealot.

Koop die e-boek by Lapa Uitgewers.

Koop by Amazon.

Gratis studiegids

Klik op die skakel om ‘n gratis studiegids vir Dromers af te laai.

Uittreksel

1

Danser

Dis pouse. Die musiek pols deur die snoepie se luidsprekers.

Jy’s die ritme in my bene
Jy’s die virus in my bloed
Jy is dans.
Jy’s die tromme in my kop
Jy’s die polsing in my lyf
Jy laat my dans.

Die leerders maak ’n kring om Byron Carelse. Hulle klap hande. Party fluit.
Byron dans dat die spoeg spat. Vandag is dit hiphop. Dis sy gunsteling-styl. Die ritme pas lekker in sy lyf. Dit maak sy kop oop. Hy voel goed. Dis wat dans aan hom doen.
“Cool, Byron!” roep een van die meisies. Hy vang haar oog. Dis Tasha – ’n meisie in sy klas. Swart hare. Oë soos sjokolade. Hulle is al lank vriende. Maar niks meer as dit nie. Net vriende.
Byron gee ’n wipstappie in haar rigting.
Tasha lag. Sy gooi haar hande in die lug en swaai haar heupe.
Naderhand doen almal dit. Dit is ’n partytjie in die skoolvierkant.
“Soek jy alweer aandag?” roep een van die matrieks skielik. Sy stem dawer bo die musiek. “Dis elke pouse se ding. Wat is dit met jou?”
Die woorde tref Byron hard. Hy dans stadiger. Uiteindelik gaan hy staan. Hy het dan gedink almal hou daarvan as hy dans.
Sy oog vang weer Tasha s’n. Sy trek haar gesig.
Byron weet wat dit beteken: Die ou is ’n trol. Moet jou nie aan hom steur nie.
Skielik begin Tasha sing. Dis asof niks gebeur het nie. Asof sy vir Byron wil sê: Vergeet van die ou. Dans!
Tasha se stem is helder en mooi. Sy ken al die woorde van die liedjie.
Dan pols die ritme weer in Byron. Hy lag kliphard. Hy kan nie stilstaan nie. Sy voete lewe. Sy lyf pop en lock en drop.

Jy’s die ritme in my bene
Jy’s die virus in my bloed
Jy is dans.
Jy’s die tromme in my kop
Jy’s die polsing in my lyf
Jy laat my dans.