“Jou nuwe haarstyl vang vlieë!” sê Ronita Snotnagel.

Lara Winters is baie opgewonde. Vandag gaan sy haar hare by die gewilde Gilda Glinster sny.

Lara ontwerp sommer self haar haarstyl.

Oe, sy gaan soos ’n prinses lyk!

Maar dan gaan iets verkeerd. En Lara kry die aakligste haarstyl ooit. Jip, een wat regtig vlieë vang.

Hoe kon dit so verkeerd loop?

Hoekom het sy nare prinses-hare gekry?

Net Ronita Snotnagel weet …

Wat sê ’n leser?

“Ek was hoogs beïndruk met die verbeeldingrykheid van die nare haarstyle wat volg wanneer die venynige Ronita Snotnagel telkens die sketse wat Lara voorberei, kaap. “

Amanda Claassens

Koop

Koop die boek in goeie boekwinkels en aanlyn.

Klik hier om die boek by Lapa Uitgewers te koop.

Klik hier om die boek by Takealot te koop.

Klik hier om die boek by Loot te koop.

Klik hier om die boek by Grafitti Boeke te koop.

Klik hier om die e-boek by Amazon te koop.

Uittreksel

Later die oggend sit Lara en Dessie in juffrou van der Kwas se kunsklas. Lara konsentreer vreeslik hard terwyl sy teken. Haar tong hang sommer uit. Eers na die derde tekening kry sy die regte prinses-haarstyl.

Sy wys dit vir Dessie.

“Oe, dis pragtig!” koer Dessie.

“LAAT EK SIEN!” roep ’n harde stem skielik agter hulle. Ronita Snotnagel het heeltyd nog met ’n skêr gesit en fyn patrone uit papier knip. Maar nou gryp sy die tekening. Lara probeer dit terugkry, maar Ronita swaai dit hoog bo haar kop. Toe spring sy op ’n stoel. “Wat is fout, Lara? Is jy te kort? Trek jou sokkies op, dalk word jy langer,” spot Ronita.

Lara klouter ook op ’n stoel. Ronita spring op ’n tafel. “Steeds te kort, Lara!” lag sy. Sy swaai die tekening nog ’n paar keer, toe kyk sy daarna. “Wie is hierdie?” vra Ronita suur.

“Dis my nuwe haarstyl,” sê Lara benoud. “Gee my prent terug. Ek gaan my hare vanmiddag so sny.”

“AG, DIS LELIK! JY SAL LYK SOOS ’N PADDA MET ’N PRUIK,” spot Ronita Snotnagel.

Dessie probeer ook nou die prent uit Ronita se hande gryp.

Maar toe Lara en Dessie weer sien, frommel Ronita die prent op. Sy druk dit in haar mond. Kou drie keer en sluk dit in! “Dit proe ook soos ’n padda met ’n pruik,” lag sy stout en BURP.